महाराष्ट्र न्यूज वन प्रतिनिधी, कोल्हापूर : आगामी निवडणुकीच्या अनुषंगाने कोल्हापूर महापालिकेने प्रभाग रचना जाहीर केली आहे. एकूण २० प्रभागातून ८१ सदस्य निवडले जातील. एक ते १९ प्रभाग हे चार सदस्यीय आहेत. तर २० नंबरचा प्रभाग हा पाच सदस्यीय आहे. या प्रभाग रचनेवर १५ सप्टेंबर २०२५ पर्यंत हरकती मागविल्या आहेत. महापालिकेच्या प्रशासक के. मंजूलक्ष्मी यांच्या स्वाक्षरीनिशी प्रभाग रचना जाहीर झाली आहे.नागरिकांच्या माहितीसाठी महापालिकेच्या स्थायी समिती सभागृहासह विभागीय कार्यालयातही प्रभाग रचनेची माहिती पाहण्यासाठी उपलब्ध आहे.

कोल्हापुरात पहिल्यांदाच चार सदस्यीय प्रभाग रचना केली आहे.यामुळे आगामी निवडणुकीसाठी सर्वच पक्ष व उमेदवारांची कसोटी लागणार आहे. प्रभाग रचना उत्तर, पूर्व, पश्चिम, दक्षिण दिशा या पद्धतीने केली आहे. चार वॉर्डाचा एक प्रभाग झाल्यामुळे नगरसेवक आता २५ हजारहून अधिक लोकसंख्येचे प्रतिनिधीत्व करणार आहेत.  प्रभाग क्रमांक वीसमध्ये एकूण पाच सदस्य असतील. या प्रभागाची लोकसंख्या ३२ हजार १२१ इतकी आहे. प्रभाग रचना जाहीर करताना त्या प्रभागाची व्याप्ती, एकूण लोकसंख्या, अनुसूचित जमाती व अनुसूचित जातीची लोकसंख्या जाहीर केली आहे.

प्रभाग एकमधील लोकसंख्या २७ हजार ७९१ इतकी आहे. प्रभाग क्रमांक दोनची लोकसंख्या  २५ हजार ७१७ इतकी आहे.  तीनची लोकसंख्या  २५ हजार ३५७ तर प्रभाग सहा मधील लोकसंख्या २५ हजार ३९४ आहे. प्रभाग क्रमांक एकची व्याप्ती गोळीबार मैदान, हुनमान तलाव, कसबा बावडा पॅव्हेलियन मैदान, बिरंजे पाणंद, भगवा चौक, कसबा बावडा पंचगंगा वैकुंठभूमी, आंबेडकरनगर अशी आहे. प्रभाग क्रमांक दोनची व्याप्ती अॅपल सरस्वती मल्टिस्पेशालिटी हॉस्पिटल, राजर्षी शाहू कॉलेज, धैर्यप्रसाद हॉल, इनकम टॅक्स ऑफिस, न्यू सर्किट हाऊस, ईएसआय हॉस्पिटल, देवणे कॉलनी,देवार्डे मळा, कदमवाडी-जाधववाडी रोड, भोसलेवाडी, कामगार चाळ, कपूर वसाहत, एमएसईबी सब स्टेशन, मुक्त सैनिक उद्यान, डीवाय पाटील हॉस्पिटल असा आहे.