महाराष्ट्र न्यूज वन प्रतिनिधी -: महाराष्ट्र राज्य महिला आयोग आणि जिल्हा प्रशासन यांच्या संयुक्त विद्यमाने 'डिजिटल इम्युनिटी' हा उपक्रम सुरू केला आहे. महाराष्ट्रासाठी पथदर्शी ठरणाऱ्या या उपक्रमाद्वारे शालेय विद्यार्थी, महिला व शिक्षकांमध्ये सायबर सुरक्षितता, सुरक्षित डिजिटल व्यवहार, सोशल मीडियाचा जबाबदार वापर, आणि सायबर फसवणुकीबाबत जनजागृती केली जात आहे.  पथदर्शी उपक्रमाचा सविस्तर आढावा जिल्हा परिषद कोल्हापूर येथे आयोजित बैठकीत घेण्यात आला.  कोल्हापूर जिल्ह्यात यशस्वी ठरलेला हा उपक्रम टप्प्याटप्प्याने संपूर्ण महाराष्ट्रात राबविला जाणार आहे.

राज्याच्या महिला व बालविकास मंत्री आदिती तटकरे आणि खासदार धनंजय महाडिक यांच्या उपस्थितीत राजर्षी शाहू छत्रपती स्मारक येथे चार जुलै रोजी या महत्त्वाकांक्षी कार्यक्रमाचा शुभारंभ करण्यात आला होता. दरम्यान जिल्हा परिषदेत आयोजित आढावा बैठकीला महाराष्ट्र राज्य महिला आयोगाच्या सदस्य सचिव नंदिनी आवडे उपस्थित होत्या. त्यांनी या उपक्रमांतर्गत कोल्हापूर जिल्ह्यातील माध्यमिक व उच्च प्राथमिक विद्यार्थ्यांमध्ये सायबर फसवणूक, ओटीपी फसवणूक, फिशिंग आणि एआयच्या सुरक्षित वापराबाबत आढावा घेतला.  ​या प्रसंगी जिल्हा कार्यक्रमाधिकारी नितीन मस्के, जिल्हा महिला बालविकास अधिकारी सुहास वाईंगडे, शिक्षणाधिकारी अशोक घुगे, कक्ष अधिकारी संजय जाधव आदी  उपस्थित होते.  ​डिजिटल माध्यमांचा सुरक्षित व जबाबदार वापर व्हावा आणि सायबर गुन्ह्यांपासून विद्यार्थी व महिलांचे संरक्षण व्हावे, हा या कार्यक्रमाचा मुख्य उद्देश आहे.