महाराष्ट्र न्यूज वन प्रतिनिधी कोल्हापूर : कोल्हापूर जिल्हा सहकारी दूध उत्पादक संघाच्या निवडणुकीसाठी नेते मंडळींनी जोडण्या करण्यास सुरुवात केली आहे. अधिकाधिक ठरावधारक सभासदापर्यंत पोहोचण्यासाठी पायाला भिंगरी बांधासारखे नेतेमंडळी व संचालक फिरत आहेत. दरम्यान काँग्रेसचे जिल्हाध्यक्ष व आमदार सतेज पाटील यांनी गुरुवारी 27 ऑगस्ट रोजी चंदगडचे आमदार शिवाजी पाटील यांच्या निवासस्थानी भेट दिली. यावेळी आमदार शिवाजी पाटील यांनी आमदार सतेज पाटील यांचा शाल व मूर्ती देऊन सत्कार केला. आमदार पाटील यांनी 25 ऑगस्ट रोजी हातकणगले ग्रामीण भाजपचे जिल्हाध्यक्ष राजवर्धन नाईक निंबाळकर यांच्या निवासस्थानी भेट दिली होती त्यानंतर दोन दिवसात त्यांनी थेट भाजपचे आमदार शिवाजी पाटील यांची भेट घेऊन आगामी गोकुळ निवडणुकीच्या अनुषंगाने चर्चा केली. याप्रसंगी गोपाळराव पाटील, राहुल देसाई, विद्याधर गुरंबे, रामराजे कुपेकर आदी उपस्थित होते.
 महायुतीतील नेते मंडळींनी गोकुळची निवडणूक एकत्रित लढवू असे यापूर्वीच जाहीर केले आहे. दरम्यान काँग्रेसचे आमदार सतेज पाटील यांनी जिल्हा संपर्कदौरा सुरू केला आहे. रोज एका तालुक्याचा ते दौरा करत आहेत. गुरुवारी ते चंदगड दौऱ्यावर होते. त्यांनी, आमदार शिवाजी पाटील यांच्या निवासस्थानी भेट दिली. इनाम सावर्डे येथे ही भेट झाली. आमदार शिवाजी पाटील यांनी गोकुळच्या कारभारावर अनेक प्रश्न उपस्थित केलेले आहेत. मंत्री हसन मुश्रीफ यांच्यावरही त्यांनी टीकास्त्र सोडले होते. महिना -दीड महिन्यापूर्वी आमदार शिवाजी पाटील यांनी गोकुळच्या निवडणुकीच्या अनुषंगाने बोलताना काँग्रेसचे आमदार सतेज पाटील आम्हाला फार लांबचे नाहीत असे विधान केले होते. तसेच त्यांनी गोकुळच्या निवडणुकीत मुख्यमंत्री देवेंद्र फडणवीस यांचा निर्णय हा आपल्यासाठी अंतिम असेल असेही स्पष्ट केले होते.