महाराष्ट्र न्यूज वन प्रतिनिधी, कोल्हापूर : महाराष्ट्र राज्य स्त्री रोग व प्रसूती तज्ञ संघटनेतर्फे विभागीय वैद्यकीय परिषद “ग्लोरियस २०२६” ही  अकरा ते तेरा सप्टेंबर २०२६ या कालावधीत कोल्हापुरात हात आहे. ही प्रतिष्ठित तीन दिवसीय परिषद हॉटेल सयाजी येथे आयोजित केली आहे.  अशी  माहिती कोल्हापूर स्त्री रोग व प्रसुती तज्ञ संघटनेचे अध्यक्ष डॉ एम. जे. नागावकर आणि सचिव डॉ. रणजीत किल्लेदार यांनी पत्रकारांशी बोलताना सांगितले.

कोल्हापूर स्त्री रोग व प्रसुती तज्ञ संघटना आणि महाराष्ट्र राज्य स्त्री रोग व प्रसुती तज्ञ संघटनेच्या अधिपत्याखाली ही परिषद होत आहे. “ग्लोरियस 2026” मध्ये प्रसूतीशास्त्र, स्त्रीरोगशास्त्र, वंध्यत्व, फिटल मेडिसिन, रिप्रोडक्टिव्ह मेडिसिन, लॅप्रोस्कोपी, मेनोपॉज, किशोरवयीन आरोग्य, लैंगिक आरोग्य, कोल्पोस्कोपी, अल्ट्रासाऊंड आणि क्रिटिकल केअर या विषयांवर अद्ययावत माहिती व मार्गदर्शन दिले जाणार आहे. डॉ. नंदिता पालशेतकर, डॉ. अमेय पुरंदरे आणि डॉ. रोहन पालशेतकर हे वक्ते वैद्यकीय क्षेत्रातील अद्ययावत ज्ञान, संशोधन आणि आधुनिक उपचारपद्धतींबाबत उपस्थितांना मार्गदर्शन करणार आहेत. परिषदेचे उद्घाटन डॉ. माधुरी कानिटकर , आमदार सतेज पाटील यांच्या हस्ते होणार आहे.
डॉ. माधुरी कानिटकर या भारतीय संरक्षण दलातील प्रतिष्ठित वैद्यकीय अधिकारी असून, लेफ्टनंट जनरल पदापर्यंत पोहोचलेल्या देशातील अग्रगण्य महिला वैद्यकीय अधिकाऱ्यांपैकी एक आहेत. पत्रकार परिषदेस अध्यक्ष डॉ. एम. जे. नागांवकर, सचिव डॉ. रणजीत किल्लेदार, डॉ. भारती अभ्यंकर ,डॉ. प्रसाद हलकर्णीकर,डॉ. इंद्रनील जाधव उपस्थित होते.