महाराष्ट्र न्यूज वन प्रतिनिधी कोल्हापूर : कोल्हापूर महापालिकेच्या अतिक्रमण निर्मूलन विभागातील अधीक्षक विलास साळोखे यांना दोन हजार रुपयाची लाच घेताना लाचलुचपत प्रतिबंधक विभागाने रंगेहाथ पकडले. रंगपंचमीच्या निमित्ताने उभारलेल्या रंग विक्रीच्या स्टोअरवर कारवाई न करण्यासाठी लाच मागितली होती. साळोखे यांच्या विरोधात लक्ष्मीपुरी  पोलीस ठाण्यात गुन्हा दाखल झाला. तसेच त्यांच्या घराची झडती घेतली जात आहे. लाचलुचपत प्रतिबंधक विभागाच्या पोलीस निरीक्षक उज्वला भडकमकर यांच्या मार्गदर्शनाखाली पोलीस अधिकारी प्रकाश भंडारे, हवालदार विकास माने, सुधीर पाटील, संदीप पवार, प्रशांत दावणे यांच्या पथकाने ही कारवाई केली. साळोखे यांच्या विरोधात  तक्रारदाराने लाचलुचपत प्रतिबंधक विभागाकडे तक्रार केली होती. त्यांनी  रंगपंचमीला रंग विक्रीसाठी स्टॉल आला होता. हा स्टॉल अतिक्रमणमध्ये  असल्याचे सांगत कारवाई टाळण्यासाठी साळोखेनी पंधराशे रुपयांचे लाच मागितली होती. तक्रारदाराने यासंदर्भात लाचलुचपत प्रतिबंधक विभागाला कळवले. लाचलुचपत प्रतिबंधक विभागाने सापळा लावला. या प्रक्रियेदरम्यान साळोखे यांनी तक्रारदाराकडे दोन हजार रुपयांची लाच स्वीकारताना पोलिसांनी रंगेहाथ पकडले.