महाराष्ट्र न्यूज वन प्रतिनिधी : आषाढी एकादशीनिमित्त दरवर्षीप्रमाणे यंदाही कोल्हापूर जिल्हा सहकारी दूध उत्पादक संघातर्फे कोल्हापूर ते प्रतिपंढरपूर नंदवाळ पायी दिंडीत सहभागी होणाऱ्या वारकरी व भाविकांना मोफत सुगंधी दूध आणि सार्थ हरीपाठ पुस्तिकांचे वाटप पुईखडी येथील रिंगण सोहळा परिसरात करण्यात आले. वारकऱ्यांची सेवा करण्याबरोबरच स्वच्छतेचा संदेश देण्याचाही उपक्रम यावेळी राबविण्यात आला.

          यावेळी गोकुळच्या प्रशासकीय मंडळाचे अध्यक्ष प्रदीप मालगावे, सदस्य सागर बलकवडे तसेच अधिकारी व कर्मचारी यांच्या हस्ते वारकऱ्यांना सुगंधी दूध, हरीपाठ पुस्तिकांचे वाटप करण्यात आले." आपली दिंडी – स्वच्छ दिंडी", "एक पाऊल भक्तीकडे... एक पाऊल स्वच्छतेकडे", "दूध पिऊया... पिशवी कचरापेटीत टाकूया", "माऊलींची वारी, स्वच्छतेची जबाबदारी" असे स्वच्छतेचा संदेश देणारे फलक गोकुळतर्फे रिंगण सोहळा परिसरात लावण्यात आले होते.

          विशेष म्हणजे, दिंडी पुढे मार्गस्थ झाल्यानंतर गोकुळच्या १५ स्वयंसेवकांनी यांनी दूध वाटप करण्यात आलेल्या परिसरातील रिकाम्या दुधाच्या पिशव्या व इतर कचरा गोळा करून संपूर्ण परिसराची स्वच्छता केली. स्वच्छतेचा संदेश केवळ फलकांपुरता न ठेवता प्रत्यक्ष कृतीतूनही गोकुळने सामाजिक बांधिलकी जपली. संघाचे डेअरी महाव्यवस्थापक अनिल चौधरी, मार्केटिंग व्यवस्थापक हनमंत पाटील, लक्ष्मण धनवडे, जनसंपर्क अधिकारी सचिन पाटील, प्रविण देसाई, संतोष पाटील, प्रमोद घोडके, उल्हास पाटील, वसंत माळवी उपस्थित होते.