महाराष्ट्र न्यूज वन प्रतिनिधी, कोल्हापूर : शिवसेना ठाकरे पक्षाच्या कोल्हापूर जिल्हाप्रमुखपदी विराज पाटील यांची नियुक्ती करण्यात आली. शिवसेना मध्यवर्ती कार्यालयातर्फे यासंबंधीची माहिती देण्यात आली. माजी जिल्हाप्रमुख रविकिरण इंगवले यांनी जिल्हाप्रमुखपदाचा राजीनामा दिला आहे. त्यानंतर जिल्हाप्रमुखपद रिक्त होते. शिवसेना पक्षप्रमुख उद्धव ठाकरे यांनी जिल्हाप्रमुखपदाच्या नियुक्तीचा निर्णय घेतला. त्यानंतर शिवसेना मध्यवर्ती कार्यालयाकडून अधिकृत घोषणा झाली. विराज पाटील हे गेली अनेक वर्षे संघटनेत सक्रिय आहेत. करवीर तालुकाप्रमुख म्हणून काम केले आहे. कोल्हापूर दक्षिण विधानसभा मतदारसंघात ते सक्रिय आहेत. नागरी प्रश्नावर आंदोलने केली आहेत. पाचगावच्या पाणी प्रश्नाच्या सोडवणुकीसाठी त्यांच्या पुढाकारातून जिल्हाधिकारी कार्यालयावर मोर्चा काढला होता.  दरम्यान इंगवले यांनी राजीनामा दिल्यानंतर नवीन शिवसेना ठाकरे पक्षाचे जिल्हाप्रमुख कोण याकडे लक्ष लागले होते. जिल्हाप्रमुखपदासाठी विराज पाटील, अवधूत साळोखे, राजू यादव, तानाजी आंग्रे अशी नावे चर्चेत होती. विराज पाटील हे शिवसेना उपनेते संजय पवार यांचे समर्थक मानले जातात. ते सक्रिय कार्यकर्ते आहेत. दरम्यान शिवसेनेतील सध्याची गटबाजी, नेतेमंडळीत विखुरलेले कार्यकर्ते, समन्वयाचा अभाव पाहता साऱ्यांना सोबत घेऊन काम करताना पाटील यांची कसोटी लागणार इतके निश्चित.