चित्रपट महामंडळाचे ४५ हजार सभासद होणार अ वर्ग,

महाराष्ट्र न्यूज वन प्रतिनिधी : अखिल भारतीय मराठी चित्रपट महामंडळाच्या नूतन कार्यकारिणीची बैठक मंगळवारी, २३ जून २०२६ रोजी पुणे येथे झाली. महामंडळाचे अध्यक्ष मेघराज  राजेभोसले यांच्या अध्यक्षतेखाली झालेल्या या बैठकीत, महामंडळाचे २०१५ पासून सदस्य असलेल्या आणि किमान तीन वर्षे सक्रिय काम केलेल्या ‘ब’ वर्ग सभासदांना ‘अ’ वर्ग सभासद म्हणून मान्यता देण्याचा ऐतिहासिक निर्णय घेण्यात आला. याचा लाभ सुमारे ४५ हजार सभासदांना होणार आहे. पुण्यात स्वतंत्र चित्रनगरी उभारण्यासाठी सरकारकडे पाठपुरावा करण्यात येणार आहे त्यासंबंधी चर्चा झाली.

 महामंडळाचे उपाध्यक्ष धनाजी यमकर, प्रमुख कार्यवाह सुशांत शेलार, खजिनदार सुनील महाजन, सहकार्यवाह दीपक कदम, सहकार्यवाह प्रवीण पाटील ऊर्फ वासू पाटील, सहखजिनदार शरद चव्हाण, विजय खोचीकर, चैत्राली डोंगरे, रवींद्र गावडे, सुभाष नकाशे, राज काझी, वर्षा उसगावकर, अजित शिरोळे, गणेश  गारगोटे, विकास तोरणे उपस्थित होते.

यावेळी बोलताना राजेभोसले यांनी, ‘ मराठी चित्रपट क्षेत्राच्या सर्वांगीण विकासासाठी 'पहिले मराठी चित्रपट संमेलन' फेब्रुवारी २०२७ मध्ये आयोजित करण्यात येणार असून त्यासाठी पुणे आणि रत्नागिरी या ठिकाणांचा विचार सुरू आहे. चित्रपट क्षेत्रातील सुमारे ६० हजार कलाकार व तंत्रज्ञांचा पुढील तीन महिन्यांत आरोग्य विमा उतरविण्याचा संकल्प महामंडळाने केला आहे. तसेच सर्व सदस्यांचे डिजिटलायझेशन करून त्यांना आधुनिक सुविधा उपलब्ध करून देण्यात येणार असल्याची माहिती यावेळी दिली. 

सोबतच मुंबई व पुणे येथे महामंडळाचे स्वतःचे गेस्ट हाऊस उभारणी, कंटेनर थिएटरची संकल्पनाही राबविण्यात येणार आहे. पुण्यात स्वतंत्र चित्रनगरी उभारण्यासाठी सरकारकडे पाठपुरावा करण्यात येणार असल्याचेही अध्यक्ष मेघराज राजेभोसले यांनी स्पष्ट केले.

तसेच भविष्यात महामंडळाचे सभासदत्व पूर्णपणे ऑनलाइन पद्धतीने उपलब्ध करून संपूर्ण प्रणालीचे डिजिटायझेशन होणार असल्याची माहितीही यावेळी देण्यात आली.  मुख्य कायदेशीर सल्लागार म्हणून पूर्वीप्रमाणेच ॲड. प्रशांत पाटील काम पाहणार असून पुण्यासाठी ॲड. मंदार जोशी यांची नियुक्ती करण्यात आली आहे.