महाराष्ट्र न्यूज वन प्रतिनिधी, कोल्हापूर  : मर्दानी खेळाची प्रात्यक्षिके, ढोल ताशांचा गजर, महिलांच लेझीम पथक, विविध विषयावरील चित्रमय फलक आणि शिवछत्रपतींचा जयघोष अशा उत्साही वातावरणात अखिल भारतीय मराठा महासंघ, कोल्हापूर शाखेतर्फे  शिवराज्याभिषेक दिन सोहळयानिमित्त मिरवणूक काढण्यात आली. मंगळवार पेठ ते छत्रपती शिवाजी चौकपर्यंत निघालेल्या या मिरवणुकीत शिवभक्त मोठया संख्येने सहभागी झाले.

 छत्रपती शिवाजी महाराज यांच्या ३५२ व्या शिवराज्याभिषेक दिन सोहळयानिमित्त मराठा महासंघ व सामाजिक सलोखा मंचतर्फे मिरवणुकीचे आयोजन केले होते. खासदार शाहू महाराज यांच्या हस्ते व आमदार सतेज पाटील, मराठा महासंघाचे राष्ट्रीय उपाध्यक्ष वसंतराव मुळीक यांच्या प्रमुख उपस्थितीमध्ये मिरवणुकीचे उद्घाटन झाले. मिरवणुकीत छत्रपती शिवरायांचा आकर्षक पुतळा लक्ष वेधून घेत होता. राजमाता जिजाऊ, शिवराय आणि मावळयांच्या वेशभूषेतील बाल चमू, महिलांचे लेझीम पथक, धनगरी ढोल, वारकऱ्यांचा सहभाग ही मिरवणुकीचे वैशिष्ट्ये ठरली.

मराठा महासंघाच्या कार्यालयापासून सुरू झालेली मिरवणूक कोळेकर तिकटी, मिरजकर तिकटीमार्गे बिनखांबी गणेश मंदिरकडे मार्गस्थ झाली. महाद्वार रोड, पापाची तिकटी मार्गे छत्रपती शिवाजी चौकपर्यंत मिरवणूक काढण्यात आली. मिरवणुकीत मराठा महासंघाचे जिल्हाध्यक्ष शशिकांत पाटील, उदय देसाई, इतिहास अभ्यासक इंद्रजीत सावंत, मराठा महासंघाच्या महिला आघाडीच्या शैलजा भोसले, चंद्रकांत चव्हाण, शंकरराव शेळके,  नगरसेविका अनुराधा मुळीक, नगरसेवक विनायक फाळके, सचिन शेंडे, अॅड. धनंजय पठाडे, संभाजी जगदाळे, अजित सासने, अशेक पोवार, प्रसाद जाधव, किशोर घाटगे, बबन रानगे, कादर मलबारी, किरणसिंह चव्हाण, मिलिंद सावंत, माजी नगरसेवक अशोक भंडारे आदींचा मिरवणुकीत सहभाग होता.