महाराष्ट्र न्यूज वन प्रतिनिधी, कोल्हापूर : अमृत महोत्सवी ब्राह्मण सभा करवीर मंगलधाम कोल्हापूरतर्फे श्रीराम कथा आणि श्री राम यज्ञ  आयोजित केले आहे. पुणे येथील निरूपणकार मकरंद सुमंत रामदासी हे राम कथा ऐकविणार आहेत. तसेच हभप गोविंद मांडवगणे हे संहिता वाचन करणार आहेत. २२ जून ते २८ जून २०२६ दरम्यान दररोज संध्याकाळी चार ते रात्री ८.३० या वेळेत राम गणेश गडकरी हॉल पेटाळा येथे श्रीराम कथा निरूपण होणार आहे, अशी माहिती ब्राह्मण सभा करवीर चे अध्यक्ष डॉ. दीपक आंबर्डेकर यांनी पत्रकारांशी बोलताना दिली.

या कार्यक्रमांतर्गत मंगलधाम येथून २१ जून रोजी ग्रंथ दिंडीचे आयोजन केल आहे. वारकरी विद्यार्थ्यांची ग्रंथदिंडी सकाळी ९.०० वाजता मंगलधाम येथून निघून महाद्वार रोड, पापाची तिकटी, दक्षिणद्वार मार्गे पुन्हा मंगलधाम येथे संपणार आहे. या दिंडीमध्ये हणबरवाडी येथील  माऊली भक्त वारकरी विद्यालय येथील ४० बालचमूंचा समूह सहभागी होणार आहे.
२२ जून रोजी कुश-लव रामायण गाती, २३ जून रोजी अयोध्या वर्णन व श्री राम जन्म, २४ जून रोजी योगवशिष्ठ, श्रीराम, भरत, लक्ष्मण शत्रुघ्न यांचे विवाह आणि अयोध्येत राज्याभिषेकाची तयारी,  २५ जून रोजी श्रीराम वनाभिगमन केवट, २६ जून रोजी अगस्ती - श्रीराम भेट, पंचवटी सीताहरण , २७ जून रोजी शबरी सुग्रीव मैत्री सुंदरकांड याविषयी प्रवचन होईल. रविवारी २८ जून रोजी सकाळी ९.३० वाजता रावण वध श्रीराम राज्याभिषेक आणि त्यानंतर महाप्रसाद होईल.दरम्यान शुक्रवार २६ जून रोजी सकाळी नऊ वाजता मंगलधाम येथे श्रीराम यज्ञ होणार आहे. पत्रकार परिषदेस उपाध्यक्ष किरण  धर्माधिकारी, कार्यवाह श्रीकांत लिमये, नंदकुमार मराठे, प्रसाद खाडिलकर, संतोष कोडोलीकर, अशोक जोशी आदी उपस्थित होते.