महाराष्ट्र न्यूज वन प्रतिनिधी, कोल्हापूर : कोल्हापूर जिल्हा परिषदेच्या ग्रामीण पाणी पुरवठा विभागाच्या जुन्या पाण्याच्या टाक्यांची परस्पर विल्हेवाट लावण्याच्या प्रकाराची प्रशासनाने चौकशी सुरू केली आहे. मुख्य कार्यकारी अधिकारी कार्तिकेयन एस यांनी या प्रकरणाची चौकशी करण्याचे आदेश दिले आहेत. या प्रकरणी शाखा अभियंता प्रदीप हुपरे यांना कारणे दाखवा नोटीस बजावली आहे. याबाबत इमारत उपविभागातील उपअभियंता सदाशिव येजरे यांनी तक्रार दिली होती.

बांधकाम विभागाचे कार्यकारी अभियंता सचिन सांगावकर यांना सीईओ कार्तिकेयन एस यांनी या प्रकाराची चौकशी करण्याचे आदेश दिले आहेत. सांगावकर यांनी शाखा अभियंता हुपरे यांना नोटीस काढली आहे. हुपरे यांच्यावर शिस्तभंगाची कारवाई का करू नये. कर्तव्यात कसूर केल्याचे दिसून येत आहे. सात दिवसात खुलासा करावा असे नोटीमध्ये म्हटले आहे.

पाच व सहा एप्रिल २०२५ या सुट्टीच्या कालावधीत हुपरे यांनी गॅस कटरने ग्रामीण पाणी पुरवठा विभागाच्या जुन्या टाक्या कट केल्या होत्या. आरोग्य भांडारगृहाच्या इमारतीमागे या टाक्या होत्या. कोणतीही पूर्वपरवानगी न घेता, पूर्वसूचना न देता हुपरे यांनी परस्पर त्या पाण्याच्या टाक्यांची विल्हेवाट लावली. या प्रकरणाची चाैकशी करुन कारवाई व्हावी अशी मागणी उपअभियंता येजरे यांनी सीईओ कार्तिकेयन यांच्याकडे केली होती.