महाराष्ट्र न्यूज वन प्रतिनिधी, कोल्हापूर  : ‘सध्याचे महायुतीचे सरकार हे नेहमी शेतकऱ्यांच्या पाठीशी खंबीरपणे उभे राहिलेले आहे. शेतकऱ्यांना नुकसान भरपाई तसेच शेतकऱ्यांसाठी महत्त्वकांक्षी निर्णय घेत आहे. त्याचप्रमाणे ब्राह्मण समाजातील आर्थिक दुर्बल घटकांसाठी सरकारने परशुराम आर्थिक विकास महामंडळाची स्थापना केली. या मंडळामार्फत फक्त ब्राह्मण नव्हे तर सर्व स्तरातील शेतकऱ्यांना योजनांचा लाभ मिळतो आहे.’ असे प्रतिपादन परशुराम आर्थिक विकास महामंडळाचे अध्यक्ष कॅप्टन आशिष दामले यांनी केले.

अखिल भारतीय ब्राह्मण महासंघातर्फे ब्राह्मण शेतकरी मेळावा, शेतकऱ्यांचा सन्मान व पुरस्कार वितरण सोहळा असा संयुक्त कार्यक्रम आयोजित केला होता. ताराबाई पार्क येथील मांगल्य कार्यालयात रविवारी हा कार्यक्रम झाला. हवामान अभ्यासक पंजाबराव डख यांनी शेतकऱ्यांना मार्गदर्शन केले. या कार्यक्रमात कराड येथील सुभाष जोशी यांना सहकार भूषण पुरस्कार, भिलवडी येथील गिरीश चितळे व विटा येथील जयंत बर्वे यांना समाजभूषण पुरस्काराने सन्मानित करण्यात आले. तसेच भुदरगड तालुक्यात दारवाड येथील छाया श्रीकृष्ण कुलकर्णी, तासगाव तालुक्यातील मांजर्डे येथील मंजुषा माधव कुलकर्णी, सातारा जिल्ह्यातील भादे येथील सुनीती सुरेंद्र धायगुडे, पन्हाळा तालुक्यातील दिघवडे येथील स्मिता सचिन कुलकर्णी, कोल्हापुरातील विद्या भरत ठकार,  शाहूवाडी तालुक्यातील मलकापूर येथील ऋतुजा हृदयनाथ देशपांडे, हेमांगी हरिहर देशपांडे,  निपाणी तालुक्यातील बेडकीहाळ येथील श्रीया मुकुंद इनामदार, वाळवा तालुक्यातील शिरपूर येथील वरदा श्रीकृष्ण हसबनीस तर माढा तालुक्यातील उंदरगाव येथील विद्या श्रीपाद कुलकर्णी या महिला शेतकऱ्यांचा सन्मान झाला.