महाराष्ट्र न्यूज वन प्रतिनिधी, कोल्हापूर : भगवान महावीर जयंती महोत्सवानिमित्त जैन इंटरनॅशनल ट्रेड ऑर्गनायझेशनच्या (जीतो ) कोल्हापूर, इचलकरंजी, चॅप्टरतर्फे गुरुवारी, नऊ एप्रिल २०२६ रोजी सामूहिक नवकार महामंत्र पठणाचा कार्यक्रम आयोजित केला आहे. जिल्ह्यातील प्रत्येक जैन मंदिर आणि तीर्थक्षेत्रांसह विविध ठिकाणी नवकार महामंत्र पठणाचा कार्यक्रम होईल. सकाळी साडेसात ते नऊ या वेळेत होणाऱ्या या कार्यक्रमात वीस हजारांहून अधिक जण सहभागी होतील अशी माहिती ‘जीतो’कोल्हापूर चॅप्टरचे अध्यक्ष रवी संघवी व सचिव अनिल पाटील यांनी पत्रकार परिषदेत दिली.

संजय घोडावत ग्रुपच्या सहकार्याने कोल्हापूर शहर आणि जवळच्या ग्रामीण भागासाठी जैन बांधवासाठी महासैनिक दरबार हॉल येथे महामंत्र पठण होईल. याठिकाणी पाच हजार श्रावक, श्राविका सहभागी होतील असेही त्यांनी सांगितले. या कार्यक्रमाच्या माध्यमातून भगवान महावीरांचा विश्वशांती, अहिंसेचा संदेश जगाला मिळावा हा उद्देश आहे. सकाळी साडेसात वाजता भक्तीसंगीत, आठ वाजून वीस मिनिटे ते नऊ वाजून वीस मिनिटे या वेळेत नवकार महामंत्र पठण होईल. दरम्यान या उपक्रमाचे उद्घाटन दिल्ली येथून केंद्रीय गृहमंत्री अमित शहा यांच्या हस्ते ऑनलाइन उद्घाटन होणार आहे.

विश्वशांतीसाठी आयोजित नवकार महामंत्र कार्यक्रमात सहभागी होण्यासाठी ‘https://navkardivas.jitoworld.org’ येथे ऑनलाइन नोंदणी करणे आवश्यक आहे. पत्रकार परिषदेला जीतोचे समन्यवक जितेंद्र राठोड, राजीव परीख, गिरीश शहा, रवींद्र देवमोरे, माया राठोड, स्वीटी पोरवाल, मिनल शहा, डॉ. पूजा पाटील, सपना शहा आदी उपस्थित होते.