महाराष्ट्र न्यूज वन प्रतिनिधी, कोल्हापूर : मध्यप्रदेशमधील महू जिल्हयात झालेल्या इंडिया ओपन शूटींग स्पर्धेत पृथ्वीराज धनंजय महाडिक यांनी कांस्यपदक जिंकले.  त्यांनी, या स्पर्धेत शॉटगन ट्रॅप या प्रकारात लक्ष्याचा अचूक वेध घेत, ५० पैकी ४२ गुण मिळवले. सोबत पदकाची कमाई केली. या स्पर्धेतील कामगिरीच्या बळावर त्यांची राष्ट्रीय शूटींग अजिंक्यपद स्पर्धेसाठी त्यांची निवड झाली आहे. पृथ्वीराज हे येथील ‘चॅनल बी’चे व्यवस्थापकीय संचालक आहेत. पृथ्वीराज महाडिक यांनी नेमबाजीच्या स्पर्धेत आपला ठसा उमटवलाय. राज्य आणि राष्ट्रीय स्तरावरील अनेक स्पर्धांमध्ये विविध बक्षिसे मिळवत, त्यांनी कौशल्य सिध्द केले आहे.नुकतेच मध्यप्रदेशमधील महू इथल्या आर्मी बेसमध्ये इंडिया ओपन ही प्री नॅशनल शुटींग स्पर्धा पार पडली. त्यामध्ये शॉटगन, रायफल, पिस्टल आणि एअर रायफल अशा विविध प्रकारात स्पर्धा झाल्या. त्यातील शॉटगन ट्रॅप विभागात पृथ्वीराज महाडिक यांनी पदकाची कमाई केली. या खेळासाठी त्यांना खासदार धनंजय महाडिक, अरुंधती महाडिक यांचे मार्गदर्शन लाभले.