महाराष्ट्र न्यूज वन प्रतिनिधी, कोल्हापूर : कोल्हापूर शेती उत्पन्न बाजार समितीच्या आवारातील शाहू सांस्कृतिक सभागृह पाडण्याच्या प्रस्तावाला विरोध आहे. साठ वर्षाच्या करारान्वये बांधा, वापरा व हस्तांतरित करा या तत्वावर समितीची जागा खासगी संस्थांना देण्याचा प्रस्ताव हा चुकीचा आहे. यामुळे बाजार समितीचा जागेवरील हक्क संपुष्टात येणार आहे. यामुळे बाजार समितीच्या हक्काची जागा व इमारत वाचविण्यासाठी आंदोलन करू असा इशारा भारतीय जनता पक्षाचे जिल्हाध्यक्ष नाथाजी पाटील यांनी दिला.

बाजार समितीच्या संचालकांची नुकतीच बैठक झाली. या बैठकीत, शाहू सांस्कृतिक सभागृह पाडण्याबाबतचा ठराव मंजूर झाला. हे सभागृह पाडून बीओटी तत्वावर खासगी संस्थेला देण्याचा विचार आहे. साठ वर्षाच्या भाडेकरारान्वये ही जागा देण्याचा प्रस्ताव आहे. संचालक मंडळाने घेतलेल्या या निर्णयाला काही नेतेमंडळीचा पाठिंबा असल्याचे म्हटले जाते. या प्रस्तावाला बाजार समितीचे व्यापारी प्रतिनिधी नंदकुमार वळंजू यांनी विरोध केला आहे. त्यापाठोपाठ आता भाजपचे जिल्हाध्यक्ष पाटील यांनी ही सभागृह पाडण्याच्या प्रस्तावाला विरोध नोंदविला आहे. तसेच आंदोलनाचा इशारा दिला.