आप्पासाहेब माळी, महाराष्ट्र न्यूज वन :  कोल्हापूर जिल्हा मध्यवर्ती सहकारी बँकेच्या ८८ व्या वार्षिक सर्वसाधारण सभेत वैद्यकीय शिक्षणमंत्री व बँकेचे अध्यक्ष हसन मुश्रीफ आणि काँग्रेसचे जिल्हाध्यक्ष आमदार सतेज पाटील यांनी एकमेकांचे चिमटे काढले.  या दोघांच्या  राजकीय चिमटयांनी उपस्थित सभासदासह व्यासपीठावरील नेतेमंडळीची मात्र हसता हसता पुरेवाट झाली.

गोकुळ निवडणुकीची धामधूम सुरू असताना बँकेच्या सभेच्या निमित्ताने जिल्ह्यातील नेतेमंडळी एकाच व्यासपीठावर होती. यामुळे सभेला उपस्थित सभासदांचे लक्ष व्यासपीठावरील नेतेमंडळी व त्यांच्या भाषणाकडे होते. व्यासपीठावर सभेला बँकेचे व्हाईस चेअरमन राजू आवळे संचालक आमदार राजेंद्र पाटील यड्रावकर, माजी खासदार संजय मंडलिक, निवेदिता माने, माजी आमदार राजेश पाटील, संजय घाटगे, ए वाय पाटील, अर्जुन आबिटकर,  सुधीर देसाई, विजयसिंह माने, भैय्या माने, बाबासाहेब पाटील आसुरलेकर, संतोष पाटील, राजेश पाटील, रणजीत पाटील, स्मिता गवळी, श्रुतिका काटकर, दिलीप लोखंडे, गजानन पाटील यांची उपस्थिती होती.

अध्यक्षीय भाषणात मंत्री मुश्रीफ यांनी बँकेचे कामकाज, विविध योजना, भविष्यकालीन धोरण यासाऱ्या बाबींचा ऊहापोह केला. भाषणाच्या समारोपाकडे वळताना त्यांनी आमदार पाटील यांच्याकडे पाहत, ‘गोकुळच्या निवडणुकीच्या प्रचारातूनही वेळात वेळ काढून आमदार पाटील से वार्षिक सर्वसाधारण सभेला उपस्थित राहिले. त्यांचे मी आभार मानतो.’अशा शब्दांत चिमटा काढला. मुश्रीफ यांच्या विधानावर व्यासपीठावरील सगळया नेतेमंडळीसह आमदार सतेज पाटील यांनाही हसू आवरता आले नाही. उपस्थित सभासदांनीही हसत हसत मुश्रीफ यांच्या विधानाला दाद दिली. मुश्रीफ यांच्या विधानावर आमदार पाटील काय बोलणार याविषयी उपस्थितांत उत्सुकता वाढली. साऱ्यांच्या नजरा त्यांच्याकडे वळल्या. आमदार पाटील यांनी मुश्रीफ यांच्याकडे पाहत, ‘ ए. वाय. पाटील यांना घेतलाय का बघायला आलो’अशा मोजक्या शब्दांत टोला लगावला. आमदार पाटील यांच्या या विधानाने सभेत पुन्हा एकदा हास्य पिकले.  

कारण जिल्हा परिषद निवडणुकीपासून ए वाय पाटील हे काँग्रेस सोबत होते. ते गोकुळच्या निवडणुकीत काँग्रेस सोबत राहणार की महायुती सोबत यावरुनही चर्चा रंगली होती. ए. वाय. पाटील यांनी सोमवारी, २८ सप्टेंबर रोजी राष्ट्रवादी काँग्रेस पक्षात प्रवेश केला. याशिवाय गोकुळच्या निवडणुकीवरुन राजकीय वातावरण तापत आहे. निवडणूक होणार की बिनविरोध होणार, बिनविरोध झाली तर कोणाला किती जागा, प्रत्येक पक्षाचे उमेदवार किती अशा चर्चा रंगत आहेत. दुसरीकडे जागा वाटपावरुन महायुतीमध्ये रस्सीखेच सुरू आहे. रविवारी, महायुतीमधील नेत्यांमधील झालेला वाद, पदाधिकाऱ्यांतील संघर्ष या घटना ताजा आहेत.