महाराष्ट्र न्यूज वन प्रतिनिधी, कोल्हापूर : औषधांची ऑनलाइन विक्री बंद झाली पाहिजे या मागणीसाठी जिल्ह्यातील औषध विक्रेत्यांनी, बुधवारी २०मे २०२६ रोजी दुकाने बंद ठेवत जिल्हाधिकारी कार्यालयावर मोर्चा काढला. या आंदोलनात जिल्ह्यातील चार हजाराहून अधिक औषध विक्रेत्यांनी सहभाग घेतला. छत्रपती शिवाजी चौक ते जिल्हाधिकारी कार्यालय असा मोर्चा निघाला. जिल्हाधिकारी डॉ. विजय राठोड यांना निवेदन दिले.

अखिल भारतीय केमिस्ट असोसिएशनकडून आंदोलनाची देशव्यापी हाक देण्यात आली होती. त्यानुसार कोल्हापूर जिल्हा केमिस्ट असोसिएशनच्या नेतृत्वाखाली जिल्ह्यातील व्यावसायिकांनी आंदोलनात सहभाग घेतला. ऑनलाइन औषध विक्री बंद करावी, नकली औषधांवर बंदी घालावी या प्रमुख मागण्या घेऊन औषध विक्रेते जिल्हाधिकारी कार्यालयावर धडकले.मोर्चातील साऱ्यांनी, पांढरा शर्ट परिधान करुन आणि खिशाला काळी रिबीन लावून आंदोलनात सहभाग घेतला. ‘ऑनलाइन फार्मसीला जोरदार  विरोध आमचा अधिकार, रुग्ण सुरक्षा हाच निर्धार’, ‘नकली औषध विक्रेत्यांवर कारवाई करा’, असे फलक औषध विक्रेत्यांच्या हाती होते.

 ‘डॉक्टरांच्या लेखी सूचनेशिवाय औषध विक्रीला पायबंद करा, बेकायदेशीरपणे घरपोच औषधे देणाऱ्यांवर कारवाई करा’या मागण्या करण्यात आल्या. जिल्हा केमिस्ट असोसिएशनचे अध्यक्ष मदन पाटील, उपाध्यक्ष किरण जाधव, संदीप मिसाळ, सचिव प्रल्हाद खवरे, खजानिस दाजीबा पाटील, सहसचिव मोहन ढेरे, संघटन सचिव सचिन पाटील, अशोक बोरगावे, महेश सावंत, चेंबर ऑफ कॉमर्सचे अध्यक्ष संजय शेटे आदींच्या नेतृत्वाखाली हा मोर्चा निघाला.