महाराष्ट्र न्यूज वन प्रतिनिधी, कोल्हापूर : कोल्हापुरातील माहिती अधिकार कार्यकर्ता जयराज भिमराव कोळीला खंडणी प्रकरणी अटक करण्यात आली आहे. सोमवारी रात्री उशिरा कागल परिसरातील लक्ष्मी टेकडी येथे खंडणी घेताना कोळी व त्याचा साथीदार युवराज मारुती खराडे या दोघांना रंगेहाथ पकडण्यात आले. कोळीने सीपीआरमधील  वैद्यकीय उपकरण पुरवठादार अजिंक्य पाटीलकडे वीस लाखाची मागणी केली होती. पाटील यांच्याकडून तीस हजार रुपयांची रक्कम स्वीकारताना स्थानिक गुन्हे अन्वेषण विभागाने ही कारवाई केली. वैद्यकीय उपकरण पुरवठादार पाटील यांच्या विरोधात कोळीने तक्रारी केल्या होत्या. वैद्यकीय उपकरण पुरवठाप्रकरणी पाटील यांना अटक झाली होती. दरम्यान भविष्यात त्रास देणार नाही यासाठी वीस लाख रुपयांची मागणी कोळीने केली होती असे तपासात पुढे आले आहे. कोळीने वीस लाखाची मागणी केली, त्यावर पाटील यांनी पंधरा लाख रुपये देण्याचे मान्य केले. कोळीकडून खंडणी मागितली जात असल्याची माहिती पाटील यांनी स्थानिक गुन्हे अन्वेषण विभागाला दिली. त्यानुसार स्थानिक गुन्हे अन्वेषण विभागाने सापळा लावला. त्यांनी आपल्याकडील तीस हजार रुपये पाटील यांना दिले. मध्यरात्री लक्ष्मी टेकडी येथे पाटील यांच्याकडून तीस लाख रुपयांची लाच स्वीकारताना कोळी याला पकडण्यात आले. कागल पोलिस ठाण्यात गुन्हा दाखल करण्यात आहे. तसेच त्याच्याकडील मोटार व मोबाइलही जप्त केला आहे.