महाराष्ट्र न्यूज वन प्रतिनिधी, कोल्हापूर : जिल्ह्यातील प्रमुख आर्थिक संस्था समजल्या जाणाऱ्या कोल्हापूर जिल्हा सहकारी दूध उत्पादक संघ अर्थात गोकुळच्या निवडणुकीचे बिगुल वाजले आहेत. जिल्हा सहकारी निवडणूक अधिकारी तथा विभागीय निबंधक सहकारी संस्थेने गोकुळकडे मतदारयादीची मागणी केली आहे. यासंबंधीचे पत्र बुधवारी दूध संघाला पाठविले असून लवकर मतदारयादी सादर  करावी अशा सूचना केल्या आहेत. प्रशासकीय पातळीवर कामकाज सुरू झाल्यामुळे गोकुळच्या निवडणुका मुदतीत होणार याची खात्री बळावली आहे.

दोन मार्च २०२६ पूर्वीच्या पात्र मतदार संस्थांची यादीची सॉफ्ट कॉपी सादर करावी असे पत्रात म्हटले आहे. गोकुळचे एकूण जिल्ह्यात ५४७० इतके पात्र सभासद आहेत. यामध्ये करवीर तालुक्यात सर्वाधिक ८६८, राधानगरीत ७०३, कागल ६२२, भुदरगड ५९८, पन्हाळा ५१९, शाहूवाडी ४५१, चंदगड ४२६, गडहिंग्लज ४०२, आजरा ३०८, शिरोळ २७४, हातकणंगले १६७, तर गगनबावडा तालुक्यात १३२ पात्र मतदार आहेत. गोकुळच्या विद्यमान संचालक मंडळाची मुदत चार मे २०२६ रोजी संपत आहे. २०२१ मधील गोकुळच्या निवडणुकीत तीन हजार ६४७ संस्थांचे ठराव दाखल झाले होते. त्यापैकी तीन हजार ६३९ ठरावदारांनी मतदान केले होते. यमध्ये २७५२ पुरुष तर ८८७ महिला ठरावदारांचा समावेश होता. गेल्या निवडणुकीच्या तुलनेत यंदा १८२३ संस्था वाढल्या आहेत. दरम्यान गोकुळच्या संचालकांच्या संख्येतही वाढ करण्यात आली आहे. पूर्वी गोकुळचे संचालक मंडळ २१ जणांचे असायचे आता संचालकांची संख्या २५ झाली आहे.