महाराष्ट्र न्यूज वन प्रतिनिधी, कोल्हापूर : महापौर, उपमहापौर आणि समिती सभापतीच्या निवडीनंतर आता महापालिकेत प्रभाग समिती सभापतिपदासाठीचा कार्यक्रम जाहीर झाला. येत्या १७ एप्रिल २०२६ रोजी या निवडी होणार आहेत. ९ ते १३ एप्रिल या कालावधीत सकाळी अकरा ते दोन या वेळेत अर्जांचे वितरण आहे. पंधरा एप्रिल रोजी दुपारी तीन ते सायंकाळी पाच या वेळेत अर्ज दाखल करण्याची मुदत आहे. १७ एप्रिल रोजी दुपारी बारा वाजून पाच मिनिटाला अर्जांची छाननी आहे. यानंतर पंधरा मिनिटे माघारीसाठी मुदत दिली जाणार आहेत. दुपारी १२ वाजून वीस मिनिटानी सभापतिपदासाठी मतदान आहे.उपजिल्हाधिकारी संपत खिलारी यांच्या अध्यक्षतेखाली विशेष सभा होणार आहे. प्रभाग क्रमांक एक गांधीमैदान विभागीय कार्यालय अंतर्गत पाच प्रभाग असून २१ सदस्य आहेत. प्रभाग क्रमांक दोन शिवाजी मार्केट विभागीय कार्यालय अंतर्गत पाच प्रभाग असून वीस सदस्य आहेत. बागल मार्केट विभागीय कार्यालय अंतर्गत पाच प्रभाग व वीस सदस्य आहेत. तर छत्रपती ताराराणी मार्केट विभागीय कार्यालय अंतर्गत पाच प्रभाग असून वीस सदस्य आहेत.