महाराष्ट्र न्यूज वन प्रतिनिधी, कोल्हापूर : ‘ शिक्षकांचा आमदार शिक्षकच हवा, शिक्षकांच्या प्रश्नांना विधीमंडळात थेट आवाज देण्यासाठी माझी माझी उमेदवारी आहे. पुणे विभागीय शिक्षक मतदारसंघातील पाचही जिल्हयांचा संपर्क दौरा केला आहे. पाठिंब्यासाठी महायुती व महाविकास आघाडीच्या नेत्यांची भेट घेतली आहे.’ असे प्रा. सचिन सानप यांनी पत्रकारांशी बोलताना सांगितले.

ऑक्टोबर महिन्यात पुणे विभागीय शिक्षक मतदारसंघाची निवडणूक होत आहे. या अनुषंगाने शिक्षक मतदार, संस्थाचालक यांच्या भेटी घेण्यासाठी सानप यांनी कोल्हापूर दौरा केला. याप्रसंगी ते कोल्हापुरात पत्रकारांशी बोलत होते. सानप हे पुणे येथील वाडिया कॉलेजमध्ये प्राध्यापक आहेत. मॉडर्न एज्युकेशन सोसायटीचे विश्वस्त आहेत. ते म्हणाले, पाचही जिल्ह्यातील प्राथमिक माध्यमिक, उच्च माध्यमिक, कनिष्ठ व वरिष्ठ महाविद्यालयातील शिक्षक आणि शिक्षकेतर कर्मचाऱ्यांशी संवाद साधत निवडणूक संकल्पपत्राची रुपरेषा मांडली आहे. शिक्षकांचा लढा केवळ रस्त्यापुरता मर्यादित न राहता मंत्रालय तसेच विधीमंडळाच्या सभागृहात कायदेशीर व धोरणात्मक मार्गाने सोडवावा लागेल. यासाठी शिक्षकांचा आमदार हा शिक्षकच असायला हवा.’