महाराष्ट्र न्यूज वन प्रतिनिधी, कोल्हापूर : आमदार अमल महाडिक यांनी मुख्यमंत्री देवेंद्र फडणवीस यांची मुंबई येथे भेट घेत कोल्हापूर शहराशी निगडित विविध प्रश्नांसंदर्भात निवेदन दिले. त्यामध्ये प्रामुख्याने कोल्हापूर महानगरपालिकेला जीएसटीच्या बदल्यात मिळणाऱ्या सहाय्यक अनुदानात वाढ करण्याची मागणी केली. कोल्हापूर महानगरपालिकेकडे जकात कर प्रणाली सुरू असताना सुरू असताना उत्पन्नामध्ये दरवर्षी सरासरी १६ ते १७ टक्के वाढ होत होती. सरकारने २०१७-१८ पासून दरवर्षी केवळ ८ टक्के नैसर्गिक वाढीने सहाय्यक अनुदान उपलब्ध करून दिले आहे. कोल्हापूर महानगरपालिकेच्या कर्मचा-यांच्या महागाई भत्ता, नियमित वेतनवाढ यामध्ये ११ टक्के इतकी नियमित वाढ होत आहे. याबरोबरच पाणी पुरवठा, मल, जल निसारण, पथदिवे याकरीताच्या विद्युत देयकात महावितरणकडून सन २०१७-१८ पासून प्रतिवर्षी सरासरी १० ते १५ टक्के वाढ झालेली आहे. म्हणजेच महानगरपालिकेच्या खर्चात प्रतिवर्षी १० ते १५ टक्के वाढ होत असताना शासनाकडून मिळणा-या सहाय्यक अनुदानात केवळ ८ टक्के नैसर्गिक वाढ देण्यात येत आहे. याकडे आमदार महाडिक यांनी मुख्यमंत्र्यांचे लक्ष वेधले. कोल्हापूर महापालिकेस सरकारकडून प्राप्त होणा-या सहाय्यक अनुदानात २०२५-२६ पासून प्रतिमाह १२ टक्के प्रमाणे नैसर्गिक वाढ करणेत यावी तसेच सन २०१७-१८ पासून १२ टक्के प्रमाणे होणारी फरकाची २७५.५२ कोटी रुपये इतकी रक्कम सरकारकडून तातडीने उपलब्ध व्हावी अशी मागणी केली.