महाराष्ट्र न्यूज वन प्रतिनिधी : ‘गोकुळने दुग्ध क्षेत्रात उभारलेली विश्वासार्हता, गुणवत्ता आणि दूध उत्पादक हिताच्या उपक्रमांमुळेच राष्ट्रीय स्तरावर काम करण्याची संधी मिळाली.  पश्चिम विभागातील दुग्ध व्यवसाय अधिक तंत्रज्ञानाधारित, गुणवत्तापूर्ण आणि शाश्वत करण्यासाठी सर्व संबंधित घटकांशी समन्वय साधून कार्य करण्याचा मानस आहे.’अशा भावना कोल्हापूर जिल्हा सहकारी दूध उत्पादक संघाचे कार्यकारी संचालक डॉ. योगेश गोपाळ गोडबोल यांनी व्यक्त केल्या.

इंडियन डेअरी असोसिएशनच्या पश्चिम विभागाच्या उपाध्यक्षपदी कोल्हापूर जिल्हा सहकारी दूध उत्पादक संघाचे कार्यकारी संचालक डॉ. गोडबोले यांची बिनविरोध निवड झाली आहे. पश्चिम विभागाच्या कार्यक्षेत्रात महाराष्ट्र, गुजरात, मध्य प्रदेश, छत्तीसगड, गोवा तसेच दमण आणि दीव या राज्ये व केंद्रशासित प्रदेशांचा समावेश आहे.

 इंडियन डेअरी असोसिएशन ही देशातील दुग्ध व्यवसाय, दुग्ध विज्ञान, संशोधन, तंत्रज्ञान, गुणवत्ता व्यवस्थापन आणि उद्योग विकासासाठी कार्य करणारी अग्रगण्य राष्ट्रीय संस्था आहे. दुग्ध क्षेत्रातील विविध घटकांमध्ये समन्वय साधणे, आधुनिक तंत्रज्ञानाचा प्रसार करणे तसेच दुग्ध उद्योगाच्या सर्वांगीण विकासासाठी कार्य करणे ही संस्थेची प्रमुख उद्दिष्टे आहेत. तब्बल ४२०० कोटी वार्षिक उलाढाल असलेल्या गोकुळचे  व्यवस्थापकीय संचालक म्हणून गोडबोले हे २०२१ पासून कार्यरत आहेत.    इंडियन डेअरी असोसिएशन (वेस्ट झोन) तसेच डेअरी टेक्नॉलॉजी असोसिएशन, पुणे यांचे माजी समिती सदस्य असून त्यांनी डेअरी टेक्नॉलॉजी, एमबीए, एम.फिल. (अर्थशास्त्र) तसेच पीएच.डी. ही उच्च शैक्षणिक पात्रता संपादन केली आहे.

          निवडीबद्दल प्रतिक्रिया व्यक्त करताना डॉ. गोडबोले यांनी ‘इंडियन डेअरी असोसिएशनच्या पदाधिकाऱ्यांचे, दुग्ध क्षेत्रातील सहकाऱ्यांचे तसेच शुभेच्छा देणाऱ्या सर्वांचे आभार मानले. त्यांनी आपल्या निवडीचे श्रेय गोकुळ दूध संघाच्या प्रगतीशील कार्यपद्धतीला, संस्थेच्या संचालक मंडळाला, प्रशासकीय यंत्रणेला तसेच दूध उत्पादक शेतकऱ्यांच्या विश्वासाला दिले.