महाराष्ट्र न्यूज वन प्रतिनिधी :‘सार्वजनिक कार्यक्रमांमध्ये अश्लिल किंवा आक्षेपार्ह नृत्य सादरीकरणास प्रतिबंध करावा. डीजे शो, ट्रॉली शोवर बंदी घालावी. यात्रा, जत्रा, धार्मिक व सामाजिक कार्यक्रमामध्ये नृत्य कार्यक्रमांना परवानगी देताना प्रशासनाने स्पष्ट नियम व आचारसंहिता लागू करावी.’ अशी मागणी कलापथक निर्माता असोसिएशनने केली आहे. असोसिएशनचे अध्यक्ष मुकुंद सुतार, उपाध्यक्ष शारदा हिलगे  व अन्य पदाधिकाऱ्यांनी पत्रकार परिषदेत ही मागणी केली. कोल्हापूरच्या सांस्कृतिक परंपरेला समृद्ध अशा लोककला, लावणी, कलापथक आणि पारंपरिक नृत्यांचा मोठा वारसा लाभला आहे. मात्र अलीकडच्या काळात काही सार्वजनिक कार्यक्रम, यात्रा, जत्रा, उत्सव व मनोरंजनाच्या कार्यक्रमांमध्ये अश्लिल हावभाव, अंगविक्षेप व आक्षेपार्ह नृत्याचे प्रकार वाढत आहेत. अशा प्रकारांमुळे महाराष्ट्राच्या सांस्कृतिक परंपरेची प्रतिमा मलीन होत आहे. यामुळे अश्लिल नृत्यप्रकार, आक्षेपार्ह डान्स शो, डीजे लावणी शो व ट्रॉली शोवर बंदी घालावी. अश्लिल नृत्य करणाऱ्या बाहेरच्या नृत्यांगणा आपल्या नावांपुढे कोल्हापूरचे नाव लावून कलानगरीच्या सांस्कृतिक परंपरेला बदनाम करत आहेत. तेव्हा कलेच्या नावाखाली अश्लिलतेचा बाजार आम्ही सहन करणार नाही.’असा इशारा कलापथक निर्माता असोसिएशने दिला आहे. यासंबंधी जिल्हा प्रशासन व पोलिस प्रशासनाला निवेदन देऊ असेही त्यांनी सांगितले.