महाराष्ट्र न्यूज वन प्रतिनिधी, कोल्हापूर : वाढदिवसाचा समारंभ हा तसा वैयक्तिक आणि कौटुंबीक स्तरावरील. वाढदिवस साजरा करण्याची प्रत्येकाची वेगवेगळी पद्धत असते. दरम्यान सामाजिक भान ठेवत अनोख्या उपक्रमांनी वाढदिवस साजरा होत आहे. शिवाजी विद्यापीठ आजी - माजी विद्यार्थी कृती समितीचे डॉ. प्रवीण कोडोलीकर यांच्या वाढदिनाचे औचित्य साधून १४ मे २०२६ रोजी एका खास शोचे आयोजन केले आहे. प्रयोदी सोशल अँड कल्चरल फाऊंडेशन, वाढदिवस समिती व संविधान सन्मान युवा प्रतिष्ठान विचारे माळ मित्र मंडळ यांच्या संयुक्त विद्यमाने बालकल्याण संकुलमधील मुले व वीटभट्टी कामगारांच्या मुलांना ‘राजा शिवाजी’हा सिनेमा दाखविण्यात येणार आहे. सकाळी १०.३० वाजता पीव्हीआर, डीवायपी येथे हा शो होत आहे. छत्रपती शिवाजी महाराज यांचा पराक्रम, तेजस्वी इतिहास या मुलांना पाहता यावा या उद्देशाने या खास शोचे आयोजन केले आहे असे डॉ. प्रवीण कोडोलीकर यांनी सांगितले. बालकल्याण संकुलमधील मुले व वीटभट्टी कामगारांच्या मुलांसाठी ही वेगळी पर्वणी ठरणार आहे.