महाराष्ट्र न्यूज वन प्रतिनिधी, कोल्हापूर : करवीर तालुक्यातील शिंगणापूर येथील राजर्षी शाहू निवासी प्रशालेतील विद्यार्थिनींच्या चौकशीसाठी जिल्हा परिषद अध्यक्षा शिल्पा खोत, मुख्य कार्यकारी अधिकारी डॉ. जॅसमिन, शिक्षण समिती सभापती शितल प्रवीण यादव यांनी शाळेत धाव घेतली. या शाळेतील सहा विद्यार्थिनींना उंदराने चावल्याची घटना घडली आहे. या प्रकाराची गंभीर दखल घेत अध्यक्षा खोत व सभापती यादव यांनी प्रशालेला भेट देत विद्यार्थ्यांच्या सुरक्षितता, आरोग्यविषयक उपाययोजना तत्काळ करण्याच्या सक्त सूचना केल्या. मुख्य कार्यकारी अधिकारी जॅसमिन यांनी सकाळी भेट देऊन पाहणी केली. जवळपास दोन तास त्या शाळा परिसरात थांबून सगळी माहिती घेतली. आवश्यक त्या सूचना केल्या. तर अध्यक्षा खोत व सभापती यादव यांनी दुपारच्या सत्रात भेट देऊन विद्यार्थिनींच्या प्रकृतीची माहिती घेतली. या प्रशालेतील त्रुटी दूर कराव्यात. शाळा व होस्टेल परिसरात स्वच्च्छता राबविण्याच्या सूचना केल्या. विद्यार्थ्यांच्या आरोग्याची काळजी घ्या. विद्यार्थ्यांची सुरक्षितता व आरोग्यविषयक उपाययोजनेत हलगर्जीपणा केल्यास कारवाई होईल असेही स्पष्टपणे बजावले.