महाराष्ट्र न्यूज वन प्रतिनिधी, कोल्हापूर : कोल्हापूर जिल्हा सहकारी दूध उत्पादक संघाची मंगळवारी (९ सप्टेंबर २०२५) वार्षिक सर्वसाधारण सभा होत आहे. या सभेच्या पार्श्वभूमीवर संचालिका शौमिका महाडिक यांच्या उपस्थितीमध्ये शिरोली येथे महाडिक गटाच्या दूध उत्पादक सभासदांची व प्रमुख पदाधिकाऱ्यांची बैठक झाली. या बैठकीला हातकणंगलेचे आमदार अशोक माने यांची प्रमुख उपस्थिती होती. दरम्यान गोकुळच्या सभेत महाडिक या व्यासपीठावर उपस्थित राहण्याची चिन्हे दिसत आहेत.

या बैठकीला जिल्हा परिषदेचे माजी सदस्य संग्रामसिंह कुपेकर,  विजय भोजे, गोकुळचे माजी संचालक विश्वास जाधव, दिलीप पाटील, तानाजी पाटील, प्रताप पाटील, हंबीरराव पाटील-हळदीकर, बी. जी. बोराडे आदी उपस्थित होते. या बैठकीत वार्षिक सर्वसाधारण सभेत काय भूमिका घ्यायची यासंबंधी चर्चा झाली. दरम्यान महाडिक गट हा गेली चार वर्षे गोकुळमध्ये विरोधी बाकावर होता. मात्र तीन महिन्यापूर्वी गोकुळमध्ये अध्यक्षपदाची निवडणूक झाली. महायुतीच्या वरिष्ठ पातळीवरुन हालचाली झाल्या. महायुतीचा चेअरमन करावा असा आदेश् निघाला. संचालक नविद मुश्रीफ यांची अध्यक्षपदी निवड झाली.

 महायुती म्हणून सगळे जण एकत्र काम करत असताना गोकुळमध्ये विरोधाची भूमिका का ? असा प्रश्न उपस्थित केला जात आहे. तर महाडिक यांनी काही प्रश्नाची समाधानकारक उत्तरे मिळायला हवीत अशी भूमिका स्पष्ट केली. मंत्री मुश्रीफ यांच्यासोबतही त्यांची चर्चा झाली. गोकुळचे अध्यक्ष नविद मुश्रीफ, ज्येष्ठ संचालक विश्वास पाटील, बाळासाहेब खाडे यांच्याशीही त्यांची चर्चा झाली. दरम्यान महाडिक या, वार्षिक सर्वसाधारण सभेसंदर्भात सोमवारी (आठ सप्टेंबर) भूमिका स्पष्ट करणार आहेत.