महाराष्ट्र न्यूज वन प्रतिनिधी : जिल्हा माहिती कार्यालय, सांगली यांच्यावतीने तयार करण्यात आलेल्या सामाजिक न्याय विभागाच्या योजनांची घडीपत्रिका तसेच पत्रकारांसाठीच्या योजनांची माहिती देणाऱ्या 'पत्रकार संवादिका' या मार्गदर्शक पुस्तिकेचे प्रकाशन राज्याचे उच्च व तंत्र शिक्षण व सांगली जिल्ह्याचे पालकमंत्री चंद्रकांत पाटील यांच्या हस्ते  जिल्हाधिकारी कार्यालयात करण्यात आले.

जिल्हाधिकारी कार्यालयाच्या बैठक सभागृहात झालेल्या या प्रकाशन कार्यक्रम प्रसंगी जिल्हाधिकारी डॉ. मैनाक घोष, जिल्हा नियोजन अधिकारी अशोक पाटील, समाज कल्याण विभागाचे सहाय्यक आयुक्त बाळासाहेब कामत, पालकमंत्री महोदयांचे विशेष कार्य अधिकारी बाळासाहेब यादव, जिल्हा माहिती अधिकारी संप्रदा बीडकर उपस्थित होते.

पालकमंत्री चंद्रकांत पाटील म्हणाले, पत्रकारांसाठी सरकारमार्फत विविध कल्याणकारी योजना राबविल्या जात असल्या तरी अनेकदा आवश्यक माहिती किंवा कागदपत्रांच्या अभावामुळे पात्र पत्रकारांना त्यांचा लाभ घेता येत नाही. ही बाब लक्षात घेऊन जिल्हा माहिती कार्यालयाने तयार केलेली ही पुस्तिका पत्रकारांसाठी अत्यंत उपयुक्त ठरेल.

पत्रकार संवादिकेत पत्रकारांसाठी असलेल्या प्रमुख योजनांची सविस्तर माहिती आहे. प्रत्येक योजनेचा लाभ घेण्यासाठी आवश्यक असणाऱ्या कागदपत्रांची माहितीही स्पष्टपणे नमूद करण्यात आली आहे. सामाजिक न्याय विभागाच्या माध्यमातून राबवण्यात येत असलेल्या प्रमुख योजनांची माहिती घडीपत्रिकेत देण्यात आली असून, त्यामुळे नागरिकांचे प्रबोधन होण्यास मदत होईल.

कोल्हापूर विभागाचे उपसंचालक प्रवीण टाके यांच्या संकल्पनेतून आणि पालकमंत्री चंद्रकांत पाटील यांच्या प्रेरणेतून ही पुस्तिका तयार केली आहे. त्यासाठी माहिती व जनसंपर्क विभागाचे प्रधान सचिव ब्रिजेश सिंह यांचे मार्गदर्शन लाभले आहे. जिल्हा वार्षिक योजना (सर्वसाधारण) व अनुसूचित जाती उपयोजना यांच्या निधीतून पुस्तिका व घडीपत्रिका तयार करण्यात आली आहे. कार्यक्रमात सहाय्यक आयुक्त बाळासाहेब कामत यांनी घडीपत्रिका तसेच, जिल्हा माहिती अधिकारी संप्रदा बीडकर यांनी पत्रकार संवादिका पुस्तिकेच्या निर्मितीमागील उद्देश स्पष्ट केला.