महाराष्ट्र न्यूज वन प्रतिनिधी :घंटेचा गजर… सर्व जण रांगेत उभे.. परेड विश्राम… परेड सावधान…, एक साथ प्रार्थना शुरू कर… एकसुरात सर्वात्मका शिवसुंदरा प्रार्थना पठण. पण ठिकाण कुठलीही शाळा नव्हती. तर होते विट्यातील हॉटेल इस्टीन इन. निमित्त होतं, रयत शिक्षण संस्थेच्या विटा हायस्कूल, विटाच्या  1995-96  या शैक्षणिक वर्षातील दहावीच्या बॅचचा स्नेहमेळावा. सेवानिवृत्त गुरूजन आणि विद्यार्थी, विद्यार्थिनी मिळून जवळपास 70 जणांनी  पुन्हा एकदा  शालेय अनुभव घेतला.

सेवानिवृत्त शिक्षक पी. एन. कुंभार, एच. के. जाधव, यु. एन. पवार आणि थोरात सर तसेच श्रीमती एम. एम. पवार आणि श्रीमती महाजन  या तत्कालिन शिक्षकांनी आवर्जून या कार्यक्रमास उपस्थिती लावली आणि विद्यार्थ्यांची हजेरीही घेतली. ‘अशी पाखरे येती आणि स्मृती ठेवुनी जाती’ म्हणत कानपिचक्या घेत, मौलिक सल्ले देत अनुभवाचेही बोल विषद केले. विद्यार्थ्यांच्या प्रगतीबद्दल समाधान व्यक्त करत आरोग्य जपा, असे सांगत भरभरुन आशीर्वादही दिले. वयाच्या पंचेचाळिशीतील मंडळींनीही हे धडे विद्यार्थ्यांप्रमाणेच आत्मसात केले.

दिवसभर हास्य विनोदात परस्परांची विचारपूस करत दोस्ती आणि दुनियादारीचे गप्पाष्टक रंगले. कुणी भावनिक क्षण टिपले. शाळेतील खोड्या, गंमती-जंमती, गृहपाठ, पीटीचा तास, खाल्लेला मार…. प्रत्येकाचं मन 30 वर्षांपूर्वीच्या भूतकाळात गेलं. अगदी शालेय जीवन पुन्हा अनुभवायचं असंच कार्यक्रमाचं स्वरूप आखलं गेलं. शिक्षकांचे पुष्पपाकळ्यांनी स्वागत तर विद्यार्थी-विद्यार्थिनींचे गुलाबपुष्प देवून स्वागत करण्यात आले. ईशस्तवन, स्वागतगीत, दीपप्रज्वलन, रयत शिक्षण संस्थेचे संस्थापक कर्मवीर भाऊराव पाटील यांचे प्रतिमापूजन करण्यात आले. ती-तो सध्या काय करते-करतो याची देवाणघेवाण झाली. शिक्षकांचे मार्गदर्शन झाले. कलागुणांचे सादरीकरणही करण्यात आले.

दिवसभर शालेय जीवनातील आठवणींना उजाळा, स्नेहभोजन आणि पसायदानाने कार्यक्रमाची सांगता.. प्रत्येकाने हृदयाच्या कप्प्यात जपून ठेवण्यासाठी या आठवणी बांधून घेतल्या आणि ही आठवण चित्रबद्ध केलेली फोटो फ्रेमही.