महाराष्ट्र न्यूज वन प्रतिनिधी, कोल्हापूर : कोल्हापुरातील नामांकित फुटबॉल संघ म्हणून श्री शिवाजी तरुण मंडळ फुटबॉल संघाची ओळख. दरम्यान या संघाने, सध्या सुरू असलेल्या ‘चंद्रकांत चषक’फुटबॉल स्पर्धेतून माघार घेतली आहे.स्पर्धेच्या उद्घाटनदिवशी श्री शिवाजी तरुण मंडळ फुटबॉल संघ व फुलेवाडी फुटबॉल संघात सामना होता. मात्र या स्पर्धेसाठी शिवाजी तरुण मंडळाचा संघ मैदानात उतरला नाही. मंडळाने पत्रकांत म्हटले आहे, ‘राजेश चषक फुटबॉल स्पर्धेच्या अंतिम सामन्यात पंचाच्या काही चुकीच्या आणि पक्षपाती निर्णयामुळे शिवाजी तरुण मंडळ संघावर मोठा अन्याय झाला अशी आमची भावना आहे. त्या सामन्यातील पंचाच्या निर्णयाविरोधात आम्ही, केएसएकडे रितसर तक्रार दाखल केली होती.त्याला एका आठवडा होऊन गेला, अद्याप केएसएकडून कोणताही ठोस प्रतिसाद किंवा निर्णय मिळालेला नाही. एका जुन्या बलाढय संघासोबत केएसए प्रशासनाची उदासिनता खेदजनक आहे. आमच्या संघाच्या बाबतीत सातत्याने उपेक्षा होत आहे.’