महाराष्ट्र न्यूज वन प्रतिनिधी : क्रीडाई  कोल्हापूरच्या विविध प्रलंबित विषयांवर  महसूलमंत्री चंद्रशेखर बावनकुळे यांच्या दालनात मुंबई येथे व्यापक बैठक पार पडली. आमदार अमल महाडिक, शााहू उद्योग समूहाचे अध्यक्ष समरजितसिंह घाटगे यांच्या प्रमुख उपस्थितीत ही बैठक झाली. बैठकीत क्रीडाई कोल्हापूरच्या विविध मागण्यांवर सविस्तर चर्चा झाली. महसूलमंत्री बावनकुळे यांनी या मागण्यांची सकारात्मक दखल घेत कोल्हापूरचे जिल्हाधिकारी विजय राठोड यांना  आवश्यक ती कार्यवाही करून सकारात्मक निर्णय घेण्याची सूचना केली. अशी माहिती क्रिडाई कोल्हापूरचे अध्यक्ष के पी खोत यांनी दिली.

 बैठकीत खरेदी दस्ताची नोंदणी झाल्यानंतर सातबारा उतारा स्वतंत्र अर्ज, फेरफार नोटीस व अनावश्यक कागदपत्रांशिवाय ऑनलाइन पद्धतीने मंजूर करण्याची मागणी करण्यात आली. त्यामुळे नागरिकांचा वेळ, खर्च आणि सरकारी कार्यालयांतील दिरंगाई कमी होण्यास मदत होईल, असे नमूद करण्यात आले. स्वातंत्र्यसैनिक व माजी सैनिकांना भोगवटादार वर्ग-२ मधील जमिनी भोगवटादार वर्ग-१ मध्ये रूपांतरित करण्याबाबतच्या सरकारी निर्णयाचा लाभ देण्याची मागणीही करण्यात आली.
  रेडीरेकनरमधील फुटनोट नुसार अद्ययावत करणे, कन्व्हेयन्स डीड करताना शिल्लक चटई क्षेत्रावरील मुद्रांक शुल्क माफ करणे तसेच कोल्हापूर शहरातील बिगरशेती झालेल्या जमिनीचे ७/१२ बंद करून तातडीने प्रॉपर्टी कार्ड उपलब्ध करून देण्याबाबतही बैठकीत सकारात्मक चर्चा झाली.  शिवसेनेचे जिल्हा समन्वयक सत्यजीत कदम, महाराष्ट्र क्रिडाईचे उपाध्यक्ष विद्यानंद बेडेकर, माजी अध्यक्ष महेश यादव, निखिल शहा, संदीप पोवार, विरेंद्र घाटगे, नगरसेवक विजेयंद्र माने आदींनी चर्चेत सहभाग घेतला.