महाराष्ट्र न्यूज वन प्रतिनिधी, कोल्हापूर हातकणंगले तालुक्यातील पेठवडगाव नगरपालिकेच्या मतदानासाठी वापरलेली मतदान यंत्रे मराठा सांस्कृतिक भवनात ठेवण्यात आली आहेत. या स्ट्राँग रूमवर लक्ष ठेवण्यासाठी सीसीटीव्ही कॅमेरे कार्यरत होते मात्र प्रशासनाने व पोलिस विभागाने हे कॅमेरे काढून टाकली आहेत. तसेच स्ट्राँगरूमच्या अगदी समोर 'मोरे' नावाच्या व्यक्तीचे घर आहे. त्यांनी स्वतःच्या सुरक्षेसाठी घराला सीसीटीव्ही कॅमेरे लावले होते. येथील मुख्याधिकाऱ्यांनी पोलिसांच्या बंदोबस्तात ते खाजगी सीसीटीव्ही काढून टाकले. एखाद्या नागरिकाने स्वतःच्या घराच्या सुरक्षेसाठी लावलेले कॅमेरे काढण्याचा अधिकार प्रशासनाला कसा काय असू शकतो? अशी विचारणा आमदार सतेज पाटील यांनी अधिवेशनात केली. पाटील यांनी ‘ सीसीटीव्ही काढण्याच्या प्रकारामुळे ईव्हीएम प्रक्रियेवर संशय निर्माण होण्यास वाव मिळतो. प्रशासनाची ही बेबंदशाही चालू असून, याची चौकशी करावी आणि हे काढलेले सीसीटीव्ही तातडीने पुन्हा बसवण्याचे आदेश सरकारने द्यावेत’ असा सुचना केल्या. याला उत्तर देताना महसूलमंत्री चंद्रशेखर बावनकुळे यांनी या प्रकरणाची दखल घेऊन चौकशी केली जाईल असे आश्वासन दिले.