महाराष्ट्र न्यूज वन प्रतिनिधी कोल्हापूर : कोल्हापूर महानगरपालिकेच्या महापौर व उपमहापौरपदाची निवडणूक लढविण्याचा निर्णय महाविकास आघाडीने घेतला आहे. अजिंक्यतारा कार्यालय येथे महाविकास आघाडीच्या नेते मंडळी व नगरसेवकांची बैठक झाली. आमदार जयंत आसगावकर, माजी आमदार ऋतुराज पाटील, काँग्रेसचे शहराध्यक्ष सचिन चव्हाण, नगरसेवक राजू लाटकर, प्रदेश पदाधिकारी सूर्यकांत पाटील बुद्धीहाळकर,  शिवसेनेचे सुनील मोदी आदींच्या प्रमुख उपस्थितीमध्ये झालेल्या या बैठकीत महापौर व उपमहापौरपदासाठी उमेदवारांची घोषणाही करण्यात आली. महापौर पदासाठी काँग्रेसचे नगरसेवक सचिन शेंडे तर उपमहापौरपदासाठी काँग्रेसचे नगरसेवक दुर्वास कदम यांची उमेदवारी जाहीर करण्यात आली. हे दोघेही दुपारी उमेदवारी अर्ज दाखल करणार आहेत महापालिका निवडणुकीत काँग्रेसचे 34 नगरसेवक तर शिवसेना ठाकरे पक्षाच्या एक नगरसेवक निवडून आला आहे. महाविकास आघाडी म्हणून महापालिकेत एकूण 35 इतके संख्याबळ आहे.