महाराष्ट्र न्यूज वन प्रतिनिधी, कोल्हापूर : “ पुणे विभागीय शिक्षक मतदारसंघाच्या निवडणुकीत एकूण ३० उमेदवार  रिंगणात होते. त्यापैकी २९ उमेदवार मला हरवण्यासाठी प्रयत्न करत होते, तर मी केवळ विजयी होण्यासाठी लढत होतो. इतिहास घडला नसून, पुढील सहा वर्षांत इतिहास घडवून दाखवीन,” असा ठाम निर्धार पुणे विभाग शिक्षक मतदारसंघाचे  आमदार शिक्षकमित्र कौस्तुभ मुरलीधर गावडे यांनी व्यक्त केला. त्यांच्या विजयानिमित्त आयोजित विजयी मेळावा हजारो शिक्षक, शिक्षकेतर कर्मचारी, संस्थाचालक, कार्यकर्ते आणि समर्थकांच्या उत्स्फूर्त उपस्थितीत जल्लोषात  झाला.

महाराष्ट्राच्या इतिहासातील विधान परिषदेतील सर्वात तरुण आमदार म्हणून कौस्तुभ गावडे यांच्या निवडीची विशेष चर्चा या मेळाव्यात झाली. त्यांच्या विजयाबद्दल विविध क्षेत्रांतील मान्यवरांनी सत्कार करून अभिनंदन केले. 

मेळाव्याची सुरुवात महाराणी ताराराणी आणि लोकराजा राजर्षी छत्रपती शाहू महाराज यांच्या पुतळ्यांना पुष्पहार अर्पण करून अभिवादनाने झाली. त्यानंतर कावळा नाका, दसरा चौक ते श्री स्वामी विवेकानंद शिक्षण संस्थेतील शिक्षणमहर्षी डॉ. बापूजी साळुंखे आणि संस्थामाता सुशीलादेवी साळुंखे यांच्या समाधिस्थळापर्यंत भव्य विजयी मिरवणूक काढण्यात आली. हजारो शिक्षक आणि कार्यकर्त्यांच्या सहभागामुळे मिरवणुकीला उत्स्फूर्त प्रतिसाद मिळाला. घोषणांच्या गजरात आणि जल्लोषपूर्ण वातावरणात शिक्षकांच्या विश्वासातून मिळालेल्या विजयाचा आनंद साजरा करण्यात आला.

विजयी मेळाव्यात मनोगत व्यक्त करताना आमदार  गावडे म्हणाले, “या निवडणुकीत ३० उमेदवार होते. त्यापैकी २९ जण मला पराभूत करण्यासाठी प्रयत्न करत होते, तर मी विजयी होण्यासाठी लढत होतो. एका आजी आणि एका माजी आमदाराला हरवून मी विजयी झालो आहे. हा विजय शिक्षकांनी दाखवलेल्या विश्वासाचा आहे. शिक्षकांच्या प्रश्नांना निश्चितपणे न्याय मिळवून देईन.”
मतमोजणीच्या प्रदीर्घ प्रक्रियेचा उल्लेख करत ते म्हणाले, “मतमोजणीच्या काळात मी ४० तास झोपलो नव्हतो; मात्र आता पुढील सहा वर्षे न झोपता काम करून दाखवीन. इतिहास घडला असे म्हणण्यापेक्षा पुढील सहा वर्षांत शिक्षकांच्या प्रश्नांवर ठोस काम करून इतिहास घडवून दाखवीन.” त्यांच्या या निर्धाराला उपस्थितांनी उत्स्फूर्त प्रतिसाद दिला.

या विजयी मेळाव्यात आमदार अशोकराव माने, श्री स्वामी विवेकानंद शिक्षण संस्थेचे कार्याध्यक्ष प्राचार्य अभयकुमार साळुंखे, कोजिमाशिचे तज्ज्ञ संचालक दादासाहेब लाड, टीडीएफचे काटकर, विद्यासमितीचे अध्यक्ष डॉ. श्रीराम साळुंखे, प्रभारी प्राचार्य डॉ. महेश गायकवाड, प्राचार्या डॉ. शैलजा साळुंखे, प्राचार्या डॉ. श्रुती जोशी, भाजपचे मा. तोरस्कर, कृती समितीचे बाबा पाटील, कृती समितीचे दत्ता पाटील,  वक्ते प्रा. मधुकर पाटील, प्रा. गीतांजली साळुंखे तसेच कौस्तुभ गावडे यांच्या  पत्नी  मयुरी गावडे यांनी मनोगते व्यक्त केली.
यावेळी विविध क्षेत्रांतील मान्यवर, पदाधिकारी आणि शिक्षक संघटनांच्या प्रतिनिधींनी कौस्तुभ गावडे यांचा सत्कार करून अभिनंदन केले. शिक्षकांच्या प्रश्नांची जाण असलेले नेतृत्व विधान परिषदेत पोहोचल्याने शिक्षण क्षेत्रातील प्रलंबित प्रश्नांना प्रभावी व्यासपीठ मिळेल, अशी अपेक्षा यावेळी व्यक्त करण्यात आली.
शिक्षक आणि शिक्षकेतर कर्मचाऱ्यांचे प्रश्न, त्यांचे हक्क व सन्मान, शिक्षण क्षेत्रातील प्रलंबित मागण्या आणि शैक्षणिक व्यवस्थेतील विविध समस्यांवर सातत्याने आवाज उठवण्याची अपेक्षा मान्यवरांनी व्यक्त केली. शिक्षकांनी दाखवलेल्या विश्वासाला कृतीतून उत्तर देण्याची जबाबदारी नवनिर्वाचित आमदारांवर असल्याचेही यावेळी नमूद करण्यात आले. या मेळाव्यास मुरलीधर गावडे, आजीव सेवक अजित देसाई, प्राचार्य डॉ. मिलिंद हुजरे, अनिल कामत आधी उपस्थित होते