महाराष्ट्र न्यूज वन प्रतिनिधी, कोल्हापूर : राज्यात शिक्षकांच्या विविध संघटना आहेत. यामध्ये महाराष्ट्र राज्य प्राथमिक शिक्षक संघ थोरात गट ही प्रमुख संघटना. संघटनेचे राज्यभर नेटवर्क. शिक्षकांसाठी काम करणाऱ्या या संघटनेने यंदा साऱ्यांनाच धक्का देत पुणे पदवीधर मतदारसंघातून निवडणूक लढविण्याचे ठरविले आहे. शिक्षक नेते संभाजीराव थोरात यांनी, शिक्षक संघाचे राज्य संपर्कप्रमुख एस. व्ही. पाटील यांना पुणे पदवीधर मतदारसंघातून उमेदवारी अर्ज दाखल करण्याच्या सूचना केल्या आहेत. त्यानुसार पाटील हे सोमवारी, पाच ऑक्टोबर २०२६ रोजी उमेदवारी अर्ज दाखल करण्याची शक्यता आहे.

शिक्षक संघ राज्यभर विस्तारले आहे. पुणे विभागीय पदवीधर मतदारसंघातील पाचही जिल्हयात शिक्षक संघ कार्यरत आहे. संघाशी निगडीत असंख्य शिक्षक पदवीधर मतदार आहेत. पदवीधर मतदारांच्या न्याय हक्कासाठी ही निवडणूक लढविण्याचा संघाचा विचार आहे. यासाठी शिक्षक संघाचे राज्य संपर्कप्रमुख एस. व्ही. पाटील यांना उमेदवारी अर्ज दाखल करण्याच्या सूचना आहेत. एस.व्ही. पाटील हे सेवानिवृत्त शिक्षक आहेत. ३८ वर्षाहून अधिक काळ त्यांनी शिक्षक म्हणून काम केले आहे. संघटनेते पहिल्यापासून सक्रिय आहेत. कोल्हापुरातील दि प्राथमिक शिक्षक बँकेचे संचालक, अध्यक्ष म्हणून काम केले आहे. तसेच छत्रपती शिवाजी शिक्षक पतसंस्था कोल्हापूरचे ते संस्थापक चेअरमन आहेत.जिल्हा परिषदेच्या शिक्षण समितीत निमंत्रित सदस्य म्हणून कामाचा अनुभव आहे.

यासंदर्भात एस. व्ही. पाटील यांच्याशी संपर्क साधला असता ते म्हणाले, ‘शिक्षक संघ, शिक्षकांशी निगडीत विविध संस्थेतील कामाचा अनुभव यामुळे शिक्षक नेते संभाजी थोरात यांनी पुणे पदवीधर मतदारसंघातून निवडणूक लढविण्याच्या सूचना केल्या आहेत. त्यांच्या सूचनेनुसार निवडणुकीसाठी आवश्यक कागदपत्रांची जुळवाजुळव करत आहेत. सोमवारी, उमेदवारी अर्ज दाखल करण्याचे नियोजन आहे. शिक्षक नेत्यांचे पाठबळ, पदवीधर शिक्षकांची ताकत आणि संघटनेची साथ या जमेच्या बाजू आहेत. कोल्हापूर, सांगली, सातारा, सोलापूर, पुणे या पाचही जिल्ह्यात शिक्षक संघाचे नेटवर्क आहे. संघटनेच्या माध्यमातून शिक्षक व पदवीधरांशी जोडलो आहे.’